ميدو فايد يكشف كواليس فيلم المدرسه مع الفنانه حورية فرغلي.. حوار

بخطوات بسيطة لكنه سرعان ما استطاع أن يلفت الأنظار بموهبته المتفردة وأسلوبه المميز، وتطور بشكل ملحوظ مع مرور الوقت، حيث انتقل من تقديم أعمال محلية إلى مشاريع ذات طابع عالمي، مما جعل اسمه يتردد في أوساط فنية متعددة، بفضل إصراره وشغفه، وكشف الفنان ميدو فايد حقيقة علاقتة بالفنانة حورية فرغلي، وكشف كواليس فيلم المدرسه و تحدث ميدو فايد حول موعد عرضه ، وصرح عن طموحاته في الوسط الفني، في حوار خاص لموقع أصل الصوره.

أولًا حدثنا عن علاقة الفنانة حورية بالفنان ميدو فايد؟

علاقتي بحورية يعني ما اقدرش اوصفها في جملتين، دي عشرة عمر و بداية شغلي وبداية الكارير ان انا ابتدي كمحترف في المجال بتاعنا، في مسلسل هي بطلة من بطلاته اللي هو مسلسل حكايات بنات الجزء الاول، وكان معانا كانت هي طبعا بطلة ودينا الشربيني، وصبا مبارك وريهام ايمن وكريم فهمي كنت انا معهم في التيم دا ومكنش ليا مشاهد معاها طبعا خالص غير هو مشهد، فبدأت علاقتنا من هنا وبقينا اصحاب جدا جدا، فالعلاقة اللي ما بيني وما بينها علاقة يعني تقدري تقولي اكثر من صحاب اكثر من اخوات بنساند بعض دايما في ضهر بعض، يعني كانت طول الوقت دايما تطلب مني ان لازم اظهر ولازم اعمل و ابقى موجود في الوقت اللي هي كانت ما شاء الله عليها كانت بتعمل فيلم ومسلسل وفي الوقت ده كنت انا بدرس في اكاديمية الفنون فكنت عايز اركز، فعلا اظهر شوية واشتغل اكثر برة في السوق بس انا كنت مركز في الكادر و ان انا اخلص الاكاديمية وبعد کده اركز ده ما كانش صح لان انا عملت مسلسل حكاية بنات الجزء الاول كنت في سنة اولى في الاكاديمية فعلقتنا علاقة كبيرة جداً علاقة عمر، فطبعا انا بحاول اختصر لك علاقتي بحورية فرغلي في الفرح معاها وفي الحزن معاها و هي نفس الكلام على طول في تواصل حتى لو انا انشغلت شوية ما بنتكلمش هي بتسأل لو عندها مشكلة ولا حاجة بتاخد رأيي حتى ممكن تاخد رأيي في الشغل اللي بيجي لها، بس يعني احنا اكثر من صحاب.

حدثنا عن لقائك مع الفنانة حورية فرغلي فى أول مشهد جمعكما معا؟

طبعاً اول شغل جمعني مع حورية فرغلي في اول مشهد احساس مختلف يعني اركن بقى الصحوبية، بس فيه كيميا حلوة جداً جداً فيه حلو اوي اوي ظهرت في الشغل والحاجات اللي احنا بنعملها مع بعض فأول مشهد ما بيني وما بينها كان حلو جداً هي حتى كانت مرتاحة جدا وهي بتشتغل معايا و قالتلي انا سايبة ايدي ومش متوترة نفس التوتر اللي بتبقى فيه دايما في اي شغل ففي كيميا حلوة جداً و اتمنى من ربنا ان هي ترجع يبقى لها مسلسلات تاني وافلام وانا هابقی اول واحد داعم لها لان انا اتمنى اشوفها انجح حد في الدنيا يعني لانها هي تستاهل.

على المستوي الشخصي من قدوتك في مجال الفن؟

انا ما ليش حاجة معينة في القدوة في المجال الفني انا بحب كل حاجة في المجال الفني، يعني كل ما يشمل الفن غناء ومزيكا وسينما ومسرح .

كيف كانت كواليس فيلم «المدرسة »؟

بالنسبة لكواليس فيلم المدرسة طبعا كانت فوق الهايلة كواليس حلوة جدا عارفة لما انت تبقي بتشتغلي في مكان انت مرتاحة نفسيا فيه ان اللي حواليك عارفينك واصحاب فانت بتشتغلي وانت مرتاح نفسيا فده مهم جدا و يطلع الشغل كويس يطلع شغل تلقائي دايما يقول لك الكواليس لما تبقى كويسة بيظهر على الشاشة ففعلا احنا كان الكواليس بتاعتنا كويسة جداً وكنا بنشتغل بقلب و أن احنا عايزين نعمل حاجة كويسة وايساف وحورية واحمد عبدالله وطارق النهري الناس اللي كانت موجودة كلهم ناس محترمة وناس فنانين كبار جداً.

ما الذي حدث في فيلم المدرسه حاليا؟

احنا المفروض خلصنا يعني هو المفروض كان فاضل مشهدين ما بيني وبين حورية او ثلاث مشاهد تقريبا عشان الفيلم يتقفل لكن مش عارف انتاجيا الدنيا ايه هو اتأجل كذا مرة و بعد كده حورية فرغلي انشغلت شوية في التصوير بعد كده انا سافرت واتمنى ان هو ينزل بقى و نشوف هينزل بشكل عامل ازاي او امتى او على المنصات او هينزل سينما لسة مش عارفين ده بقى قصة انتاج وقصة شركة انتاج وتوزيع .

لماذا لم نسمع اخبار عن عرض فيلم المدرسه؟

أحنا مستنيين الشركه المنتجه تعلن على موعد نزول الفيلم لكن ما تبلغناش لسه بمعاد.

ما هي طموحاتك في الوسط الفنى؟

والله طموحاتي في المجال الوسط الفني ما لهاش حدود يعني هو السؤال صعب اوي، فنفسي اعمل حاجات كتير جداً بتمس شباب يعني بتمس جيلنا والجيل اللي قبلينا والجيل اللي بعدينا الاجيال اللي موجودة دلوقتي نفسي العب كراكترات كتير جداً يعني الوقت بيجري ونفسي ابتدي اشيل بطولة فيلم اقدر اشيل بطولة مسلسل فنفسي يعني اوصل للعالمية وانا بالفعل قربت من العالمية انا مش موجود في مصر حاليا انا بصور حاجة مهمة جدا.

ميدو فايد متعدد المواهب حدثنا عن عملك بالسياحه؟

عملي في السياحه يعتبر انا اتربيت عليه ونشأت بيه فأبي وكل فرد من عائلتنا كان لديه عمل بالسياحه حتى ولو كان يتخصص في مجال اخر.

كيف تقوم بالتوافق بين المجالين المهمين؟

كنت بوفق ما بين الاتنين دايما الشركات السياحة اللي انا بشتغل معاها انا بشتغل مع اهم شركات في مصر و أنا بعمل انترفيو في مره المدير بتاعي ياباني كنت ببقى صريح جداً معاه أن هو بيبقى عنده خلفية ان ميدو ممثل فكان بيقول لي برضو نفس السؤال هتوفق ازاي لو عندك تصویر فانا باعرف اوفق لو انا مثلا عندي تصوير باخد الجدول بتاع الشغل بتاعي بديه للمخرج المنفذ و بناء عليه بظبط مواعيدي مع مواعيد التصوير بتاعتي لو هيتعارضوا الاتنين مع بعض بضطر أن ابلغ الشركة عندي ان انا مش هقدر اطلع الشغل دا عشان التصوير.